Fréttir

Hjónin, Bjarnhildur Hrönn Níelsdóttir og Friðrik Kristinsson fóru út í desember síðastliðnum til að sækja tvær litlar stelpur sem þau hugðust ættleiða frá Kólumbíu og bjuggust þá við að vera úti í kringum 6 vikur. Þau eru ekki ennþá komin heim tæplega ári síðar en í dag féll dómur í Hæstarétti í Medellinn í Kólumbíu og eru systurnar Helga Karólína og Birna Salóme nú löglega dætur þeirra Bjarnhildar og Friðriks. Systurnar og foreldrar þeirra ættu að koma heim á næstu vikum. Stúlkurnar eru tveggja og fjögurra ára gamlar og hafa myndað náin tengsl á þessum mánuðum sem þau hafa dvalið saman úti.

Biðu í fimm ár

Bjarnhildur og Friðrik höfðu beðið í fimm ár á biðlista eftir ættleiðingu. Þau fóru, eins og áður sagði utan í desember síðastliðnum og bjuggust við að vera í Kólumbíu í nokkrar vikur. Vikurnar urðu að mánuðum og tæpu ári. En nú geta stúlkurnar loksins komið heim. Mál þeirra hefur verið talsvert í fjölmiðlum en þegar að hjónin fór að sækja dæturnar kom það þeim í opna skjöldu að kólumbískur dómstóll neitaði þeim um að ættleiða stúlkurnar. Áður höfðu þau fengið heimild kólumbískra yfirvalda fyrir ættleiðingunni.

Á Facebook síðu fjölskyldunnar segir eftirfarandi:

„Loksins loksins loksins dómur er fallinn í Tribunal (Hæstarétti í Medellin) og var okkur dæmt í vil :D Helga Karólína og Birna Salóme eru orðnar löglegar dætur okkar. Þær eru svo yndislega fullkomnar litlar snúllur, svo innilega litlu stelpurnar okkar og núna fær því engin breytt!!! Við verðum alltaf saman!!! Við höfum beðið svooo lengi eftir þessum degi og erum við að springa úr gleði og hamingju :)

Það voru þrír dómara sem dæmdu í málinu okkar í þetta skipti og voru þeir allir sammála um það að dómari nr. 9 hafi ekki haft hagsmuni stelpnanna að leiðarljósi og að öll vinna ICBF hafi verið til fyrirmyndar.

Næstu skref eru að fá vegabréf og vegabréfsáritun heim til Íslands fyrir Helgu Karólínu og Birnu Salóme. Við búumst við því að vera komin heim til Íslands eftir 10 – 14 daga og er mikil tilhlökkun hjá okkur fjölskyldunni.“

Hér er hægt að fræðast meira um mál þeirra hjóna

http://www.dv.is/frettir/2012/11/22/daeturnar-koma-loksins-heim/