Fréttir

Hækkun á heildarkostnaði við ættleiðingu hefur ekki komið til framkvæmda. Þá er Íslensk ættleiðing hætt við að krefjast þess að umsækjendur greiði nýtt 60 þúsund króna gjald fyrir 1. apríl eða líta annars svo á að umsækjendur hafi fallið frá umsókn sinni. Þetta kemur fram í yfirlýsingu frá Ingibjörgu Birgisdóttur, varaformanni Íslenskrar ættleiðingar. Í bréfi sem Íslensk ættleiðing sendi félagsmönnum nýlega var tilkynnt að kostnaðurinn verði 2,5-2,8 milljónir króna með ferð- um, fyrst og fremst vegna gengisfalls íslensku krónunnar. Heildarkostnaðurinn mun samkvæmt því næstum tvöfaldast en hann hefur fram til þessa verið 1,2-1,5 milljónir króna, samkvæmt upplýsingum Fréttablaðsins. Í yfirlýsingu varaformannsins segir að stjórnin harmi það að kynning á þessu nýja fyrirkomulagi hafi ekki verið nægilega skýr frá hendi félagsins. Gerð verði ítarlega grein fyrir henni á aðalfundi á næstunni. Hópur umsækjenda hjá Íslenskri ættleiðingu veltir fyrir sér að kanna réttarstöðu sína vegna hækkunar Íslenskrar ættleiðingar. Skýringar félagsins þykja óljósar og almenns eðlis og ákvörðunin sjálf órökstudd og óskýrt hvar og af hverjum hún hafi verið tekin. Félagsmenn sem Fréttablaðið hefur rætt við benda á að heildarkostnaður sé ekki sundurliðaður, einstaka kostnaðarliðir ekki tilgreindir og ekki gerð grein fyrir því hver raunáhrif gengisfallsins eru. - ghs 

Fréttablaðið - Hækkun á heildarkostnaði við ættleiðingu nærri tvöfaldast milli ára